العودة   منتديات المصطبة > الأقسام الأدبية > منتدى الشعر والخواطر

منتدى الشعر والخواطر للأشعار والخواطر المكتوبة "للحـَرفِ توهّـجْ.. مـَراياَ للصـُدورْ تـُرجُمـَان للمشاعـِر"


1 
روفان


أنا إخوان ..
أنا إخوان .. وكل المسلمين إخوان ...
فما تصنّـفش إسلامي على كيفَك ..
حقيقتي أقوى من زيفك ..


وصابعي لوحده بكفوفك ..
ولا اتهزّش قصاد خوفك .... يا خوف يا جبان ..
أنا إخوان .. باطيع الله في ملكوته ..
وبادعي يزيدني من فضله ومن قوته .. واصلي واصوم ..
واجاهد نفسي واصبر ع البلا واحمد .. وحمدي يدوم ..
لأنه الرازق الوهّاب ..
وهو مسبّب الأسباب .. فليه الفضل والمنّة .. وليه الطاعة ..
فما تبصّش لديني نظرة طماعة ..
أنا ديني لا هو سلعة ولا بضاعة .. ولا ليه سوق ..
لا انا بايع ولا شاري .. إيماني هو راسمالي .. فإصحى وفوق..
مانيش إخوان على نهجك .. فلمّ من الدروب وهجك .. كفاية شقوق ..
مش انت لوحدك الإخوان .. أنا إخوان .. على السُنّة وع القرآن ..
وقت الجَدْب .. انا عثمان ..
ووقت الحرب .. انا حمزة ..
ووقت الفصل ببقى فاروق ..
أنا إخوان على التقوى .. وع الرحمة .. وحب الناس ..
لكن عمري ما حتأخون بأخونتك على الصندوق.

عنيكم فيها كل النور ومش شايفة ..
غباوة انك تهدد ناس ماهيش خايفة ..
بتهدّد في مين يا حزين ؟؟ ده انا الآه اللي طلقوني ..
وجيعة وسارحة في الشارع ومش ممكن حتخفوني ..
حتسمعني ..
وغصبٍ عن عنيك الجوز على دماغك حترفعني ..
أنا الناس اللي عاشت تحت خط الفقر ..
وانا الناس اللي ماتت مالتقتش القبر ..
فسيبك م اللي بيجاملك وبيهيّص ..
وتفضالي وتسمع كلمتي كويّس ..
أنا الثورة اللي عملت منك الريّس.

أنا اللي يا دوب من سنتين كنا بنِـتْحبس صُحبة ..
وكنا بنتجلد صحبة ..
وكنا في الميدان صحبة ..
بتبعد ليه ؟؟ وتكتب ع الطريق غربة ..
بتمشي في الطريق وحدك ليه مهمّلني ؟؟
ما لو صعبة عليك الشيلة حمّلني ..
حتلقاني بعارضك آه .. لكني وراك ..
بجدّف في السفينة معاك ..
أكون وِدْنك .. واكون عينك ..
أكون قوة في دراعينك ..
مش انت تاخد لي في القرارات .. وانا اللي امسح بإيدي دَرَاك ..
ما تتلككش بالناس اللي بيعارضوك .. ما تتشتتش .. ما تتسوحش ..
بلدنا عايزة ريس وحش ..
يسمع نقده بودانه .. ما يتكبرش ..
يكون جبار على الظالمين .. رحيم بينّا ..
ينام بينّا ويقوم بينّا ..
يمشي يعسّ في الشارع على الجعانين ..
ويفهم إن في الشارع شباب ثايرين ..
ما لحقوش يبقوا كارهينك .. فما تزوّدش نار الكُره في قلوبهم ..
شباب شايف فلوس بلده .. مش بتخشّ في جيوبهم ..
ما تخدعناش ببقين من بتوع (حسني) يا مولانا ..
وِرِمْنا كلام وصدّا من الغُـنا قفانا ..
ما تدبحليش حمامة يتيمة على عينها .. وتقنعني انه ديك رومي ..
ما تلعبش انت في المية .. وتمسح إيدك المبلولة في هدومي ..
ومش كل لما توعد وعد .. تطلع بُق ..
ما تشِدّش فرامل اليد .. وتطلب من أنزل ازُق ..
ولما الناس تكون ثايرة ومختلفة .. ما تخطبليش في أتباعك ..
ولما تكون مع وزيرة .. ما تلعبليش في دراعك ..
ولا تسمعني ولا أهلي ولا عشيرتي ..
وخيري يبقى لولادي قبل ما ابص على جيرتي ..
بلدنا حواض من البركة بعمر النيل ..
بلد دفيانة بالقرآن وبالإنجيل ........



2 
Immigrant

جميله اووي القصيده دي يا روفان
ممكن تبعتيلي الفيديو

عاوز اقلك قصه ف الشغل النهارده
بقرا اخبار وكده
لقيت فيديو للزمر بيقول لو اسقطوا مرسي
احنا مجهزين الملتوف والالغام وغيره والتفجيرات
فبقل لاخواني شوف مين بيدعي للعنف
لقيته بيقول دا احسن منك دا مربي دقنه وبيتبع السن
سمعته كلمتين كتموه
شوفي بقه مربي دقنه هههههه بقه ختم النسر


3 
روفان

اقتباس: المشاركة الأصلية كتبت بواسطة Immigrant  مشاهدة المشاركة
جميله اووي القصيده دي يا روفان
ممكن تبعتيلي الفيديو

عاوز اقلك قصه ف الشغل النهارده
بقرا اخبار وكده
لقيت فيديو للزمر بيقول لو اسقطوا مرسي
احنا مجهزين الملتوف والالغام وغيره والتفجيرات
فبقل لاخواني شوف مين بيدعي للعنف
لقيته بيقول دا احسن منك دا مربي دقنه وبيتبع السن
سمعته كلمتين كتموه
شوفي بقه مربي دقنه هههههه بقه ختم النسر


مغسي ياشادي ردك اجمل

هههههههههههههههه والله حاجه غريبه جدا وهو حكم عليه انو كويس لمجرد انو مربي دقنه

طيب ياريت يحترم الاسلام والسنه ال بيمثلها بدقنه ال مربيها ويبطل كلام هنعمل ونخلي عيب والله

الفيديو اهو

http://vBulletin.almstba.co/t249165.html

نورتني l


4 
roka Abd Elrahman

أحسنتـــــى الاختيار يا روفان قصيدة جميـــــلة جداا بس مين يسمع ...؟!


6 
Tawfik


لسا سامعهـا انبارح ياروفان جميلة جميلة بمعنى الكلمــة

تسلمى يارب على اختياراتك الدقيقــة

+ ليكى ولـِ هشام ^^


9 
nona saso

(انسحبوا)
انسحبوا .. كان اللاسلكى بعيد ... والعسكرى ما سمعش ... انسحبوا .. شوف العجب يا ولاد ... العسكرى ما رجعش ... انسحبوا ... اطرش دة ول...ا صنم ... ارجع يا جندى بيادة ... دخل العدو العريش ... ارجع خلاص بزيادة ... العسكرى سامع ... لكنه واد مجدع ... شال آر بى جيهه وضحك : اشمعنى أنا اللى أرجع ؟ وقف الزمن مذهول ساعتين بيشاهد الجندى قام كبر المدفع اتشاهد الدبابات ظهرت "ارجع يا جندى نظام" دة كان كلام القيادة ودة برضو وقت كلام وقف الولد ددبان ... يا سادة يا سامعين ... صادهم كما الدبان ... محروس يا واد من العين ... الدبابات صفين ... اتفاجأوا وافترفوا ... على كتفه كان مدفع ... وعلى الجبين عرقه غطى العفار النار .... ولا حد عاد شايف والدبابات بتهل ... ودة برضه مش خايف الضحكة على وشه ... ماتقولش بيصيف ولسة الزمن واقف ... مبسوط ومتكيف الدبابات كترت ... والكترة غلابة .... والقلب لو مؤمن ... ولا الف دبابة حتقولوا مات الولد ... أنا اقولكم لأ عاش ... ما الجنة ولا فيها موت .... ولا تتدخل ببلاش

10 
nona saso

(البغبغان)
إهداء لكل حكام العرب المتسابقين لإرضاء الولايات المتحدة الامريكية

كان يوم مَطَر ..
البغبغان جُوَّا القَفَص طَلَّع لِسانُه لعصفورين فوق الشجر ..
خَلِّيكو سايقين العناد ..
العِشّ قاد ..
وخسِرتُو ويَّاه الولاد .. لَـمَّا انفَجَر ..
هو انتو حِمْل السِيل ؟؟ ولا حِمْل المطر ؟؟
كان فيها إيه لو تِعْمِلُوا زيِّي وتقولوا زَيّ ما يقول البَشَر ؟؟..

ردُّوا علِيه العصفورين : لَوْ عَ الوِلاَد .. البَطْن ولاَّدة ..
والعِشّ مَهْمَا يقِيد ..
صخر الجبل عَنَاقِيد ..
نِفْرِشْهَا سِجَّادة ..
وانتَ اللي فرحان بالقَفَـص ..
أصْلَـك ( قَفَص ) !!..
كَتَمُوا الهوا جُوَّاك و نَسُّوك ان ما بين الحياة والموت .. نَفَس ....


Powered by vBulletin® Copyright ©2000 - 2020, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.