العودة   منتديات المصطبة > الأقسام العامة > منتدى النقاش الجاد

منتدى النقاش الجاد ناقش معنا بهدوء وبدون تعصب أشهر وأهم القضايا والمواضيع التى تشغل الجميع

مش راكبه خالص

كاتب الموضوع: ابو الوليد النبوى، فى قسم: منتدى النقاش الجاد


1 
ابو الوليد النبوى

السلام عليكم ورحمة الله وبركاته
ان شاء الله بكره عندنا فى الشغل حفله لواحد زميلنا علشان طالع معاش
وعادة الشركه ان احنا بنجمع فلوس من بعض ونعمل لأى زميل لينا طالع معاش حفله
بنقدمله فيها هدايا علشان يفضل فاكرنا ونحتفل بيه وبنعزم كبار المهندسين
المهم الراجل اللى طالع بكره ده اسمه " سمير سدره جرجس "
باين طبعا من اسمه انه نصرانى " مسيحى "
واللى مسئول عن الحفله هو انا ابو الوليد النبوى " سلفى "
بس دى مش مشكله
المشكله وانا بجمع الفلوس من الاخوه الزملاء تقريبا كلهم قالو نفس الكلمه " هو مفيش غيرك يعمل الحفله دى اقولهم ليه يقولو اصل مش راكبه خالص : سلفى ومسيحى متمشيش"
اقولهم ليه يا جماعه ما احنا كل يوم بناكل ونشرب مع بعض وهو اللى معلمنى كل حاجه فى الكهربا هو اللى عارفنى يعنى كابلات ويعنى احافظ على نفسى وانا بشتغل ليه مش انا اللى اعمله الحفله بتاعته
..
وسؤالى ليكم
هل علشان انا سلفى مينفعش انى اتعامل مع نصارى
ويا ترى مين اللى نشر الفكره دى عند الناس
وياترى احنا فعلا كلنا كويسين مع بعض بالذات السلفيين والنصارى بس دى حرب اعلاميه وله ايييييييييييه؟؟
منتظر اجابتكم علىاحر من الجمر
..
ملحوظه
لا يجعلنك غضبك منى ان تبدى برأيك فى هذه القضية
فجميع الاراء تهمنا



2 
عيون حائره

تفكير غرييييييييب جدا بصراحه
ايه اللي يمنع ان سلفي يعمل حفله لمسيحي
كلنا في الاخر مصريين وعايشين في بلد واحده ولازم العلاقات بينا تبقي كويسه
وهيفرق ايه سلفي عن باقي المسلمين لو علي كلامهم بقي اللي مينفعش السلفي يعمله مينفعش ان باقي المسلمين يعملوه
معندهمش اي حق في تفكيرهم ده ومش لاقيه اي مبرر خالص
انا عن نفسي عمري ما حسبتها كده


3 
mandolen

انا شايفة انها مافيهاش مشكلة خاااااالص
والمفروض اننا مانتعاملش مع بعض بمبدأ دة مسيحى ولا مسلم
الانسان مواقف
وبالنسبة للى بينشر الفكرة دى هو اكيد الاعلام ليه دور كبير
واللى عمل حساسية كبيرة وفتنة بين الطائفتين
لكن فى النهاية اقول ان موقفك سليم والجدعنة مابتفرقش بين واحد والتانى


4 
S α ү з D

المواقف الانسانيه مبتفرقش بين ديانه واخرى او لون واخر

بدليل اننا بنتأثر بحاجات بنشوفها ع ناس منعرفهمش

ودى حاجه كويسه ربنا هيجازيك عنها خير بغض النظر عن مسيحي ومسلم

لكن فى ناس تفكيرهم كده مش بيحسبوها انها مجدعه او تعاطف او انسانيه

تسلم وجزاك الله خير عـن ما فعلت


5 
سندريلا القلوب

وسؤالى ليكم
هل علشان انا سلفى مينفعش انى اتعامل مع نصارى
لا طبعا مين اللى قال كده كلنا مصريين
دا بالعكس لازم تعمل كده علشان تثبت ان الكلام الكتييييييييييير الكذب اللى بقى بيفرق المصريين اكاذيب انا عن نفسى اى حد سواء مسلم مسيحى بيتكلم ويدخل ف موضوع الاديان ويبدأ يقول كلام ..... مش بحترمه
ويا ترى مين اللى نشر الفكره دى عند الناس
بعض الاشخاص اللى فكرهم غلط عن الدين سواء مسلم او مسيحى خلى الناس تصدق الاكاذيب انا من اللى حصل معايا يخلينى اصدق اى حاجه لانى اتعرضت لمواقف حقيقيه


نـــــــــ توبيك ـــــايس


6 
RoMaNt!C♥AnGeL


انا مش هقول كلام زيادة عن اللى قالته يونا وmandolen
احنا كلنا مصريين ومفيش حاجة اسمها مسلم ومسيحى
الناس دى بتفكر بطريقة غريبة اووووووى

وفعلا فى بعض الاعلاميين ليهم دور كبير فى الموضوع دا
وبعض الشيوخ المشددين
والله هما زيهم زينا فيهم الكويس وفيهم الوحش
المهم هما بيتعاملوا معانا ازاى وموقفهم معانا ايه
بس وانا مش شايفة ان فيه اى مشكلة انك تعمل الحفلة دى ليه بالعكس
دى حاجة حلوة منك اوى وموقف مفروض يخلى ناس كتيرة تفهم ان هوا دا الصح وان مفيش فرق بين مسلم ومسيحى واننا لازم نبقى مع بعض فى كل حاجة
مش نقسم نفسنا ونتجنب الناس ونخلق افكار غريبة نبرر بيها ان اللى احنا بنعمله دا هوا الصح
ومش نسمع كلام من حد ونعمل بيه لازم نجرب نتعامل مع بعض كويس
الايام وخصوصا الايام اللى جاية دى لانها هتبقى صعبة اوى
وانا بتعامل مع مسيحيين ومعاملتهم كويسة اوى وقريبين للقلب كمان
يعنى انا مش شايفة مشكلة خالص
واسفه انى طولت عليك
وشكرا ع الموضوع اللى جاى فى وقته دا





8 
أحبُكَ ربى

هو انا قبل ما اشارك معاك فى النقاش تعالى نعمل سويا مسودة نلخص فيها الاجابة

عشان تكون الصورة كاملة ومظبوطة :

الاول لازم نوضح شئ مهم وهو اننا نعرف يعنى ايه سلف " سلفى " ؟

من هو السلفى ..

هم الصحابة والتابعون وتابعى التابعين

) من هم الصحابة ؟--الصحابة جمع صحابي ٬ والصحابي: هو من لقي النبي صلي الله عليه وسلم مسلما ومات علي ذلك.

ii) من هم التابعون ؟
--التابعون جمع التابعي٬ والتابعي:هو من لقي أحد من الصحابة واعتقد معتقدهم وسلك سبيلهم ومات علي ذلك

iii) من هم تابعوا التابعين ؟--هم من تتلمذ علي أيدي التابعين ٬ واعتقدوا معتقدهم وسلكوا سبيلهم وماتوا علي ذلك.

وهؤلاء لهم الخيرية من حديث رسول الله عن غيرهم
وقد ثبت في الصحيحين عن عبد الله بن مسعود رضي الله عنه ، عن النبي صلى الله عليه وسلم أنه قال : " خيرُ الناسِ قرني ثم الذين يلونهم ثم الذين يلونهم ...

ولايتسع المقام لذكر خيريتهم من القرآن والسنة ،

فالمنهج السلفى هو المنهج الذي سار عليه السلف رضي الله عنهم في العقيدة والعمل والسلوك والدعوة والتزكية، وبعبارة أخري هو ما كان عليه الصحابة رضي الله عنهم ، والتابعون لهم بإحسان إلي يوم الدين ممن شُهد له بالإمامة والتقي والعلم والعمل ، والسلفية منهج ، وليست حقبة تاريخية ، كما يظن البعض .

وحتى لا أطيل عليك وقبل أن أختم أشير إلى نقطتين الأولى


أن السلفية منهج الإسلام ليست من صنع البشر ، فهي فهم القرآن والسنة بفهم الصحابة وتابعيهم بإحسان إلي يوم الدين ، ولمزيدٍ من الإيضاح نقول أن مؤسس المنهج السلفي هو رسول الله ، لأنه هو الذي وضع الأسس التي يجب أن يسير عليها المسلم في فهم الكتاب والسنة .
[ المنهج السلفي هو منهج الإسلام في فهم القرآن والسنة ] ...

ومن خلال ماذكرت فقطعاً المشكلة هنا هى التصنيف السياسى والإ أنهم لو علموا ماقالوا الذى ذكرت فكلنا مسلمون نسير على منهج رسول الله وصحابته وتابعيهم وتابعيهم بإحسان إلى يوم الدين ...

ده الجزء الأول أو اعتبره المسودة اللى أردت أن أبدأ بها كلامى ...

وطالما هما ارتضوا لك هذا التصنيف انك سلفى فاشرح لهم ماكان عليه رسول الله وصحابته الأطهار وتابعيهم وتابعيهم بإحسان إلى يوم الدين [ اشرح لهم منهجك فى التعامل مع الآخر ] وحينها ان كانو يعطون للحق قدره فسيقولون [ ما أحق بهذا اليوم إلا بمن يعرف منهج رسول الله ] انا لا ازكيك لكن بكمل معاك توابع هذه التصنيفات التى ابتلى الله بها شعب مصر نسأل الله العافية .

ودعنى اعيش معاك فى ظلال رحمة الله ورحمة رسوله الكريم " نبى الرحمة " وصحابته الأخيار الأطهار ...

الله سبحانه وتعالى يرسل نبيه " موسى وهارون " إلى فرعون الذى طغى وكان يقول " أنا ربكم الأعلى " وتخيل معى بقلبك .. قال الله تعالى " اذهبا إلى فرعون إنه طغى فقولا له قولاً لينا "

◘ قول لأصحابك فى الشغل ده تعامل ربنا مع هذا الطاغية فكيف بتعاملى مع بشر مثلى .

قال الله تعالى " وما أرسلناك إلا رحمة للعالمين "

◘ قول لاصحابك فى الشغل انا اسير على منهج رسول الله الذى أرسل رحمة للعالمين .

عن أبي هريرة رضي الله عنه أنه قال :
قيل : يا رسول الله ! ادع على المشركين . قال " إني لم أبعث لعانا . وإنما بعثت رحمة "رواه مسلم .


قول لاصحابك فى الشغل ان منهج رسول الله هو الرحمة الرحمة التى ظاهرها وباطنها الايمان وليس رحمة ظاهرها الكلمات الخداعة من مواطنة وتعايش ومحبة
.

عارف ياهشام كنت ناوى ان اكتب كل ماوصى به النبى الكريم " نبى الرحمة " محمد صلى الله عليه وسلم بأبى أنت وأمى يارسول الله لكن وانا بكتب جه فى بالى موقفين والله من أروع مايكون .
فيهم الخلاصة ... " او الزتونة زى مابيقولو "

فمن حديث أبي هريرة رضى الله عنه ، أن رسول الله صلى الله عليه وسلم قال: " بينا رجل يمشي، فاشتد عليه العطش، فنزل بئرا فشرب منها، ثم خرج فإذا هو بكلب يلهث يأكل الثرى من العطش، فقال: لقد بلغ هذا مثل الذي بلغ بي، فملأ خفه ثم أمسكه بفيه ثم رقِيَ، فسقى الكلب، فشكر الله له فغفر له. قالوا: يا رسول الله! وإن لنا في البهائم أجراً؟ قال: في كل كبد رطبة أجر "



تخيل جزاء ساقى حيوان " الكلب " يرسل الله له شهادة تقدير " فشكر الله له " موقع عليها بصك الغفران " فغفر الله له "


هكذا ديننا وهذا ما وصانا بيه حبيبنا محمد صلى الله عليه وسلم مع الحيوان فما بالك بإنسان
وإن كانو يصنفونك بهذا التصنيف " سلفى " فأنت أحق منهم بتلك الحفل وهذا التكريم ..

توكل على الله واستحضر النية وابتغى بهذا العمل رضاء وجه الله تعالى واقتداء سنة رسوله
غفر الله لى ولك ولجميع المسلمين ، ووقى الله مصر وأهلها شر الفتن والبلايا

أقول قولى هذا وأستغر الله لى ولكم وأعتذر للإطالة ...





Powered by vBulletin® Copyright ©2000 - 2020, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.