العودة   منتديات المصطبة > الأقسام الترفيهية > المهيسون فى الأرض

المهيسون فى الأرض إفتكاسات وتهييس "بدون زعل"، شوية فرفشة على شوية نكت على مقالب مضحكة

مذكرات واحد عاقل

كاتب الموضوع: أنا المصرى، في قسم: المهيسون فى الأرض


1 
أنا المصرى

الجزء الأول: تجربتي الأولي ع الفيسبوك

انا متعود اصحي الصبح بدري، لكن النهاردة ايه اللي خلاني اصحي بدري مش عارف؟

انا كنت نايم سمعت جرس الباب بيرن، لقيت الموبايل جنبي قلت اشوف مين ع الموبايل لقيته فاصل شحن قلت ف بالي يووووه انا لسه هنزل اجيب كهربه من تحت خليني نايم شوية.
شوية لقيت جرس الباب بيرن تاني، قلت ف بالي مبدهاش اقوم اشوف مين ع الباب. قمت فتحت باب التلاجة لقيت ورك بطة قلت ف بالي كدا تمام احشي شاندوشت ف ورك البطة وبعدين اقوم انام.
بعد ما اكلت شاندوشت الجبنة الرومي رحت انام تاني لغاية الصبح.
شوية لقيت باب الجرس بينادي، قلت ف بالي مبدهاش انام ع الجنب التاني يمكن الصوت يروح.
لقيتهم بيقولولي طيب ما تقوم ترشبلك كباية شاي تعدل دماغك؟ قلت ف بالي فكرة حلوة، لكن غريبة؟ هم مين اللي بيكلموني دول؟ انا قاعد في الشقة لوحدى. بجد دي حاجة تخلي الواحد يخاف، الشقة مسكونة عفاريت ولا ايه؟ المهم قلت لهم طيب اعملوا لي كباية شاي.
جابولي كباية الشاي، شربت اول شفطة لقيتها ناقصة سكر، قلتلهم يااااااه دي ناقصة سكر، هو السكر اللي عندنا خلص؟ دا انا لسه جايب كيلو رز من يومين.
المهم ركنت كباية الشحن جنب العربية لقيت الموبايل خلص شاي.
المهم قلت ف بالي خلاص مبدهاش لازم اقوم ادخل المطبخ اطس وشي بشوية ميه. رحت عشان ادخل الحمام وقفت في الصالة، حاجة غريبة هو الحمام يمين ولا شمال؟ قلت اجرب ارجع لورا. جيت ارجع لورا خبطت في الدش قلت بس كدا انا في الحمام، غريبة هو السقف راح فين؟ ايه اللي جاب السطح هنا؟ ولا انا طلعت السطح وانا مش واخد لبالي؟ ولا لتكون دي البلكونة؟ المهم رجعت تاني الشقة وقلت اكمل نوم.
شوية لقيت جرس الباب بيرن تاني، قمت بصيت م الشباك ملقيتش حد. المهم ببص جنبي لقيت كباية الشاي دافية والموبايل بيترعش، قلت ف بالي خلاص اقوم اشوف صباح الخير يامصر جيت اشغل التليفزيون لقيت العاشرة مساء شغال قلت ف بالي كدا تمام انا بحب اسمع تفويق كعاشة. وانا بتفرج لقيت في ايدي شاندوشت ورك البطة قطمت منه حته لقيته لسه ناشف قلت ف بالي اسيبه شوية كمان يدفي.
المهم وانا قاعد بتفرج رن جرس الباب تاني، لقيتني جنب الباب قلت ف بالي مقوم اشوف الباب علي مين، ببص م العين السحرية لقيت واحدة حلوة اوي قلت ف بالي لا كدا احلوت اوي. فتحت باب التلاجة حطيت شاندوشت ورك البطة ورحت اكمل نوم.
المهم دخلت الحمام لقيته واسع اوي وابيض ف ابيض، قلت ف بالي كدا تمام، اطس شوية ميه بوشي. جيت اشغل الحنفية لقيتها فاصلة شحن افتكرت اني نسيت اجيب زيت التموين.
المهم لقيت الصابونة هناك قلت ف بالي كدا تمام اغسل وشي بصابون كمان جيت ارفع الصابونة لقيت تحتها كيس السكر قلت ف بالي كدا تمام نزود معلقة شاي ع السكر. المهم مسكت الصابونة وبليتها بشوية ميه وقعدت الفها في ايدي لقيتها بتعمل رغوة، كل ما الف تزيد الرغوة لحد ما الحمام ما اتملي رغوة وبقيت هتخنق م الرغوة قلتلهم طيب اعمل ايه قالولي بطل تلف ايدك، بطلت الف ايدي لقيت الصابونة لسه بترغي قلتلهم الحقوني اعمل ايه قالولي لف ايدك عكس عقارب الساعة لفيتها عكس عقارب الساعة لقيت الرغوة بتزيد اعمل ايه؟ رحت افتح شباك الحمام عشان الرغوة تطلع لقيت ازازة زيت وقعت م الرف، انا ايه اللي جابني المطبخ؟
جيت البس البنطلون لقيت فردة واحدة بس بدور ع الفردة التانية لقيتها بتلعب ف البوتاجاز جيت ازرر القميص لقيته برباط ربطته وزررت الجزمة ونزلت ع الشغل.
جيت افتح باب الشقة لقيت واحدة حلوة اوي واقفة ع الباب، قلت ف بالي ما اخد معايا البطاقة عشان وانا راجع اجيب التموين، بحط ايدي ف جيبي لقيت الأبنوبة قلت ف بالي كدا تمام يبقي مش فاضل غير اتنين جنيه واتجوز.
جيت انزل لقيت البت الحلوة دي بتكلمني، استاذ شحاته؟ قلت لها لأ ونزلت، وانا نازل افتكرت طيب ما انا اسمي شحاته يمكن كانت عاوزاني؟ قلت ف بالي يعني مفيش غيري انا الشحاته في البلد؟ وبعدين انا مش استاذ انا باشمهندس، انا باشمهندس؟ هو انا باشمهندس ولا دكتور؟ طيب يمكن انا مشتشار أو ظابط ، طيب يمكن البت عندها حق واطلع استاذ فعلا؟ طيب والعمل ايه دلوقتي؟ طيب ازاي انا رايح الشغل وانا مش عارف انا شغال ايه؟ طيب لو رحت ولقيت اني شغال مروض اسود هعمل ايه؟ يانهار مش زي بعضه مروض اسود؟ لا ياعم انا بخاف من الأسود، خلاص بقي بلاش اروح الشغلانة المهببة دي.


قلت ف بالي انا ارجع البيت تاني، جيت ادخل العمارة بتاعتنا لقيت البت الحلوة طالعة م العمارة اللي جنبينا قالت لي حضرتك تعرف شقة استاذ شحاته فين؟ قلت لها لأ معرفش، دخلت العمارة بتاعتنا وقلت ف بالي طيب ما أنا شحاته يمكن تقصدني انا؟ بس انا مش استاذ، طيب ما يمكن اطلع استاذ وانا مش عارف؟ لا اكيد هي قصدها علي حد تاني وبعدين الشقة دي مش بتاعتي دي انا واخدها ايجار قانون جديد حلو.
جيت ادخل البيت لقيت المفتاح مش بيلف الباب، جربت الف الباب ع المفتاح برضوا مش بيفتح طيب وبعدين؟ فجأة لقيت الباب بيفتح وواحد طالعلي م البيت، جيت اخش البيت لقيت الراجل دا ماسكني وشاددني لبرا، ايه ياعم، المهم مسكت فيه مسبتش حته في جسمي الا وضربتها في ايديه وراح داخل جو البيت ورزع الباب، طيب والعمل ايه؟ والكتاكيت دي مين هيزغطها؟ لقيت ف ايدي شاندوشت ورك البطة قطمت منه قطمة لقيته بيقطع دوست ع الدبرياج وغيرت للخامس ودخلت ف الحيطة.



2 
so crazy bnota

يلاااااهوي ع البطاطس اللي ف الموضوع

هههههههههههههه دي هلاوس قبل النوم


3 
أحمد1999

ههههههههههه


4 
أحمد1999

ههههههههه عاقل فعلا


5 
أحمد1999

ههههههههههههه
موضوع جميل


6 
أنا المصرى

اقتباس: المشاركة الأصلية كتبت بواسطة so crazy bnota  مشاهدة المشاركة
يلاااااهوي ع البطاطس اللي ف الموضوع

هههههههههههههه دي هلاوس قبل النوم







ههههههههههههههههه بالظبط كدا


7 
أنا المصرى

اقتباس: المشاركة الأصلية كتبت بواسطة أحمد1999  مشاهدة المشاركة
ههههههههههههه
موضوع جميل



مرورك الاجمل يا ابوحميد :)


8 
رحمة اشرف

ياااااااااااااااااااااااااااااااااااالهوى ربنا يجنك انا تهت اصلا
بس نيس توبيك


9 
mero 3yza hero

هههههههههههههههههه
انت متأكد ان دا واحد عاقل
دا صنف عالـــــــــــــــــــــــى..!!


10 
أنا المصرى

اقتباس: المشاركة الأصلية كتبت بواسطة رحمة اشرف  مشاهدة المشاركة
ياااااااااااااااااااااااااااااااااااالهوى ربنا يجنك انا تهت اصلا
بس نيس توبيك



وهو دا المطلوب :) : ) :)



Powered by vBulletin® Copyright ©2000 - 2021, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.